Igiit ang dagdag na budget para sa mga pasyenteng may dengue!

Mula Enero hanggang Setyembre 3 ngayong taon, umaabot na sa 63,741 ang mga kaso ng dengue sa buong bansa habang 373 naman ang naitalang patay bunsod ng nasabing sakit. Pinakamataas ang Metro Manila na may 14,081 na sinundan ng Central Luzon (11,427), CALABARZON (Cavite, Laguna, Batangas, Rizal, Quezon) (9,414), Ilocos (8,811), at Cagayan Valley (3,942).

Sa Metro Manila, pinakamataas pa rin ang Quezon City na may naitalang 4,385, Caloocan City (1,802), Manila (1,620), Valenzuela (1,029), Pasig (800), at Malabon (706).

Bukod sa pagkakasakit, dobleng dagok ang nararanasan ng mga pasyente sa mga ospital. Obligadong gumastos ng hindi bababa sa P5,000 kada pasyente kahit yaong mga nasa charity ward para sa complete blood count (CBC), oral rehydration solution (ORS), dextrose solution (3-4 bags kada araw), karayom para sa dextrose, at lancet o karayom para sa pagkuha ng dugo. Idagdag pa ang P1,500 kada bag ng dugo na kakailanganing isalin sa pasyente kung kailangan.

Bagaman ibinabandila ng Department of Health (DOH) at Malacañang ang “No Balance Billing” ng PhilHealth bilang “sagot” sa mga gastusin ng 5.2 milyong pinakamahihirap na pasyente, hindi nito totoong natutugunan ang kalunos-lunos na kalagayan sa mga pampublikong ospital. Marami sa mga pampublikong pasilidad ang kulang o walang gamot at reagents sa kanilang botika at kulang o sira ang mga pasilidad sa laboratoryo.

Hindi solusyon ang PhilHealth sa problemang pangkalusugan ng mamamayan dahil sa napakaraming limitasyon nito. Dahil sa kakulangan ng budget ng mga ospital ng gubyerno, kailangan pa ding maglabas ng pera ang mga mahihirap na pasyente dahil napipilitang pumunta sa mga pribadong laboratoryo at botika sa loob o labas ng ospital ang kaanak ng mga pasyente upang maitawid ang pangangailangan ng kanilang mahal sa buhay.

Sa halip na dagdagan ang budget ng mga pampublikong ospital, lalong ibinubukas ng pamahalaang Aquino sa mga dambuhalang negosyante ang serbisyong pangkalusugan ng mamamayan sa pamamagitan ng programa nitong Public Private Partnership (PPP). Lalong mawawalan ng kakayahang makapagpagamot ang mga mahihirap dahil negosyo at hindi serbisyo ang layunin ng mga namumuhunang ito.

Hindi lamang lamok kundi ang kawalang aksyon ng pamahalaan sa problemang pangkalusugan ng mamamayan ang sanhi ng kabi-kabilang outbreak ng dengue. Artipisyal at mistulang “pamasak-butas” ang mga hakbang na isinasagawa ng gubyerno dahil hindi nito nasasapul ang tunay na sanhi ng sakit na ito – mababang budget pangkalusugan.

Para sa mamamayan, dapat tayong magkaisa upang igiit ang ating karapatan sa kalusugan. Sama-sama nating ilantad ang mga mapanlinlang na programa ng gubyernong Aquino gaya ng PPP.

Magkaisa tayo upang igiit:

P2 bilyon special budget para sa mga pasyenteng may dengue!
P5 bilyon budget para sa pag-iwas sa dengue!
PPP o pribatisasyon, hindi solusyon sa problemang pangkalusugan!
PhilHealth, di sagot sa kawalan ng serbisyo!


Muli tayong magsama-sama sa Setyembre 29, 9:00 ng umaga sa harap ng University of Santo Tomas, España, Manila at tayo’y magmamartsa patungong Malacañang upang igiit ang dagdag na badyet sa kalusugan.

AHON-Isla (Samahan ng mga Naninirahan sa Isla Puting Bato)• Community Health Workers ng Pasig • Community Health Workers ng Alyansa ng mga Nakatira sa Tabing Ilog – Damayang Lagi •Kilos Bayan Para sa Kalusugan • Parañaque Wide Community Health Workers’ Association